Na tardiña deste xoves botou a andar o novo proxecto do Unión Sociedade Deportiva, co que afrontará a tempada na Segunda Autonómica. Con un plantel practicamente novo, tan só repiten catro xogadores e os xuvenís, o equipo que dirixirá o arousán Ricardo Dios buscará recuperar o posto perdido o ano pasado na Primeira Autonómica. O primeiro compromiso da dura tempada será no Monte da Vila, nun amistoso, ante o CF Cruceiro do Hio, este sábado ás 20 horas.

VER FOTOGRAFÍAS

Texto: J. Otero | Fotos: M. Muñíz

Tras a foto de rigor, o presidente do club, José Manuel Otero Nel, dirixiuse ao plantel, agradecendo en primeira instancia aos catro xogadores que non “fuxiron” tras o descenso e decidiron quedarse no Unión SD esta tempada. Nel dirixiuse ás novas incorporacións, indicándolles que “neste club van a estar ben, porque existe unha boa sintonía entre xogadores e directiva”. Por último, o Presidente, que non falou do obxectivo para a tempada, pero que o deixou entrever, pediulles a todos “compromiso e que dean o callo, que os resultados xa virán”.

Pola súa parte, o novo adestrador, Ricardo Dios, dixo estar ilusionado por volver adestrar, xa que o ano pasado non exerceu, e agradeceulle á directiva a confianza depositada na súa persoa para este novo proxecto. Dios animou aos xogadores a facer grupo e a traballar en conxunto. Pediulles que se coidaran, puntualidade e responsabilidade a hora de adestrar, cordialidade entre os compañeiros e coa directiva. O adestrador arousán si falou do obxectivo, que non é outro que o ascenso, pero “sen obsesións”.

Tras as verbas, os xogadores realizaron varias carreiras de quecemento e disputaron un partidillo, antes de gozar dun aperitivo cos directivos a pe de campo.

Pretemporada

A apertada pretemporada dará comezo pronto para o Unión SD. O vindeiro sábado 31, os de Ricardo Dios saltarán a escena nun amigable ante o Cruceiros do Hio. O encontro terá lugar no Monte da Vila ás 20 horas. En menos dunha semana, os grovenses volverán saltar ao campo do Monte da Vila, esta vez ante o Nigrán na disputa da Copa Deputación, venres 6 ás 20.15 h. E o domingo 8, o III Trofeo Tecnolar enfrontará ao Unión SD e ao Cambados a partir das 19.30 horas.

O seguinte compromiso será o primeiro e único fora do Grove. Dena e Unión loitarán polo Trofeo Prefabricados Dana no Campo do Cachizas (Dena), o domingo 15 ás 19.00 horas. O Bertamiráns será o rival o domingo 22 (19 horas no Monte da Vila), da 6ª edición do trofeo Concello do Grove. Por último, os grovenses recibirán o domingo 29, tamén ás 19 horas, ao Catoira nun amigable.