Lampáns acolleu este sábado o segundo derbi local da tempada na liga de veteranos de Pontevedra. Mecos e Amanecer repartíronse os puntos nun encontro no que os locais dispuxeron das mellores ocasións. O empate non permite ao Amanecer distanciarse dos postos de descenso á falta de seis xornadas para o remate da competición.

VER FOTOGRAFÍAS

Texto: J. Otero | Fotos: M. Muñiz

Mecos Veteranos: Fonso (porteiro), Tote, Modesto, Muñiz, Trelles, Santi, Chuco, Chaves, Beni, Mario, Tito, Víctor e Jorge.

Amanecer Veteranos: Santi e Miguel (porteiros), Lu, Lino, Muñiz, Fernando, Pele, Manolo, Nené, Esquilachi, Jose, Iván, Vilacho, Nando, Goday, Fran e Bandido

O equipo de San Vicente afrontaba este derbi coa necesidade de romper unha racha de catro derrotas consecutivas e lograr tres puntos que lles permitisen ampliar a súa distancia cos equipos en postos de descenso ao grupo segundo. Finalmente non foi así, pero o Amanecer amarrou un punto que resultou bo despois dun encontro no que o Mecos dispuxo de moi boas ocasións para gañar.

A pesar de que ningún dos dous equipos lograba ter o control total do balón, foron os locais os que crearon o maior perigo na meta defendida por Santi primeiro, e por Miguel despois. As boas intervencións dos metas visitantes foron cruciais para que Mecos non lograse os tres puntos. Aínda que menos, o Amanecer tamén dispuxo das súas ocasións, pero esta foi unha tarde na que a efectividade brillou pola súa ausencia.