A asociación local remata o ano coa vista posta na actividade a desenvolver no próximo ano, no que pretenderán manter a liña de traballo actual baseada na organización de regatas de dornas a vela e saídas abertas para o fomento da navegación tradicional.

VER FOTOGRAFÍAS

Redacción | Fotos: M. Muñiz

A entidade que preside Lino Prieto levou a cabo esta tarde a súa asemblea xeral ordinaria  nas instalacións do CIPES, en Punta Moreiras. Entre os puntos da orde do día estaba a memoria de actividades deste 2009 na que destacan a organización da XIII Regata dos Faros, a II Regata de San Vicente en colaboración co Club Náutico San Vicente do Mar, a Regata do Marisco incluída no programa da festa gastronómica, así como diversas colaboracións con outras entidades e colectivos.

Participacións

Amigos de Dorna Meca ven participando durante toda a tempada en infinidade de eventos por toda a xeografía galega, boa mostra de elo son o desprazamento das súas embarcacións e tripulantes ao IX Encontro de Embarcacións Tradicionais de Galicia Muros 2009, a Festa do Mar de Combarro, a Tall Ship Atlantic Challenge de Vigo e as diversas regatas de dornas a vela disputadas por toda a ría de Arousa.

Saídas abertas

A asemblea acordou tamén que a asociación continuará a desenvolver as Saídas Abertas, unha actividade dirixida ao público en xeral, na que toda persoa que teña interese ou curiosidade por coñecer a navegación tradicional a vela poida experimentala a bordo do buque-insignia da entidade: a dorna Meca.

Racú

A maiores da xuntanza asemblearia a asociación aproveitou a xornada para achegar ao Centro de Interpretación da Pesca e a Salga unha das súas embarcacións, o Rakú, unha embarcación que permanecerá exposta no interior ata a próxima temporada, cando volverá a navegar pola ría.