A celebración da segunda edición desta regata reuniu a 30 dornas na praia de Porto Meloxo, unha xornada que mesturou lecer e deporte organizada polo Bar Meloxeira en colaboración coa Asociación de Amigos da Dorna Meca.

Texto e fotos: L. Prieto

As embarcacións cegaron de portos das rías de Arousa e Pontevedra, como O Grove, Illa de Arousa, Cambados, Vilanova de Arousa e Portonovo. A pesar de que o día nas súas primeiras horas semellaba de todo desapacible, foron numerosas as tripulacións que se achegaron ata Porto Meloxo para disfrutar dunha agradable tarde de navegación.

Logo dunha espectacular saída na que as dornas tiveron que partir da praia, o vento de proa propiciou un espectáculo formado polas 30 embarcacións dando bordos para saír do bocana do porto e completar un percorrido que as levou ata o faro das Pedras Albas e un paso obrigado diante da praia do Carreiro.

Clasificación

A clasificación completouse coa Fuxe no primeiro posto, da Asociación de Amigos da Dorna Meca e con Manolo Parada na caña; a Cariñosa, de Victor e Checo, pola Asociación Cultural Dorna, no segundo lugar; e a Xarandeira de Santiago Mougán, da Asociación Fasquía, de terceira.

Penúltima regata

Ao remate da proba as tripulacións reuníronse na paria para degustar de un pincho e unhas sardiñas asadas nun ambiente de cordialidade. A seguinte cita para as dornas será tamén no Grove, o vindeiro 3 de outubro na Regata do Marisco 2009, a cal pecha o calendario da presente tempada.