Numeroso público asistiu esta tarde de martes á botadura da dorna Sara, unha embarcación construída nos Estaleiros Hijos de J. Garrido, en Lordelo, e que combina as formas tradicionais das dornas de tope con técnicas propias de outras embarcacións e a máis moderna tecnoloxía orientada á náutica de recreo.

VER FOTOGRAFÍAS - VER VÍDEO TVG

Texto: L. Prieto | Fotos: M. Muñíz/L. Prieto/D. Otero

Unha dorna de tope de case nove metros de eslora, cabinada, aparellada con vela cangrexa, trinqueta, xénova e gennaker; así é a dorna Sara, a máis recente construción do estaleiro grovense dos irmáns Garrido. Pasaron 15 meses desde que se iniciaron os traballos de construción, que se puideron seguir na rede a través da páxina www.dornasara.com, ata que finalmente hoxe fora botada ao mar. Nesta primeira travesía a vela acompañaron ao armador, Xosé Avelino Ochoa; o enxeñeiro que deseñou a embarcación, Íñigo Echenique: o carpinteiro, Pepe Garrido, e o responsable da elaboración da vela, Ramón Albert.